Chissa è ra strata di li mia lamienti
CCa ci passava (d)iu quann'era amanti
Mo' nun ci passu cchiù stanni cuntenta
Strata vuogliu cangia' di goji avanti
Strata vuogliu cangia' di goji avanti

Ca t'haju amata cumi 'nu briganti
Lupu di notti e falcu 'nta lu vientu
Ca t'haju amata e no, nun mi nni pientu
Sfidu lu cielu ppi 'su sintimentu
Ppi tia, mancu lu 'npiernu mi spaventa

Ca t'haju amata e tu sa' beni quantu
Contr' ogni leggi ed ogni 'mpidimentu
S'amuri è statu ed è, ppi mia, 'nu vantu
Picchì senza di tia nun sugnu nenti
'Sa vita senza tia nun vali nenti

Ma chissa strata la cacciu di menti
Si tu mi cierchi ccu cori trimanti
Si 'n piettu nun ha' cchiù forza d'amanti
Ca ccu curaggiu vinci ogni turmientu:
Senza curaggiu restanu lamienti.