'SA STRATA MI LA FAZZU A PASSU A PASSU

'Sa strata mi la fazzu a passu a passu
Li guardiji ci truovu e nun mi ciessu
'N capu ci tiegnu cumi 'nu granni chiassu
Ca c'è l'amuri miu sutta pruciessu

Ca ppi amari a mia nun teni spagnu
Nè di lu scuru e mancu di la stanchizza
Ca ppi aviri a mia cumi cumpagnu
Iddra si joca tutta la giuvinizza

Stativi accuorti genti nun la tuccati
C'haiu misu da parti ogni accurtizza
E viegnu quannu menu vi l'aspittati
Viegnu e v'arruobbu paci e cuntintizza

Picchì si truovu ca iddra ha ciangiutu
Guai a chi li vulìa liga' li vrazza
Cumi n'aquila agguantu a chi l'ha firuta
Lu cori ci lu tiru a piezzu a piezzu

Picchì l'amuri miu nun teni curpi
Sulu 'nu granni amuri 'nchiuvatu 'n piettu
E ppi 'su sintimentu cilatu 'n cuorpu
Spida ru tiempu e puri li cieli tutti

Nissunu po' capisciri finu a 'n funnu
Chiddru ca stà faciennu, ppi mia, 'sa donna
Nuddru richiamu esisti chi la cunfunni
Sulu ppi mia è Puttana e ppi mia è Madonna

Fimmina:
   Vieni cumpagnu miu, vienimi a fiancu
   C'avimu fari 'nu caminu avversu
   Si l'affruntamu 'nsiemi nenti ni stanca
   Si rimanimu suli, nua simu persi

Mancu la jamma cavuda di lu 'npiernu
Pò avi' 'na forza tali ca pu' ni staglia
'Nsiemi amu fattu Stati e facimu Viernu
Simu dua facci di 'na stessa foglia