Tu senza ca mi guardi ccu' chiddr'aria disulata
O turcinij lu culu quannu sa' ca t'haju guardata
E senza ca t'ammucci ccu ra manu 'na risata
Picchì si' stata mia ancora prima d'essi' nata

Si' stata mia ppi luochi stritti e 'nta l'immensitata
'Nta 'n'uortu di lattuchi e 'n mienzu a campi prufumati
Si' stata mia 'nta l'erva vird' e frisca di 'nu pratu
Tu erasi 'na vacca ed iu 'nu toru scatinatu

Si' stata mia supa linzola frischi di vucata
'Nta lietti addrì li jammi eranu sempi appiccicati
Cum'aquili sirvaggi fiancu a fiancu hamu vulatu
E supa cuozzi, fraschi, scuorpi e amuri hamu 'ntrizzati

Assiemi a testa gavuta ed assiemi hamu strisciatu
'Nta grupi e 'n mienzu a petri, cumi serpi  'ncuddrurati
E nun c'è statu nenti 'n terra ca n'ha siparati
Ca nenti po' scucchiari dua sirpenti 'nturciniàti

Si' stata mia ccu gioia e chira gioia l'ha gridata
'N faccia aru munnu e a quanti ni vulissinu 'mpicati
Si' stata 'na jumenta ed iu cavaddru sugnu statu
Contru ara luna, assiemi, cumi cani hamu abbajàtu

E mo' ca simu ccà nun si pò tèniri ammucciàta
'Sa forza ca ni stringi e ca ni lassa senza jatu
E senza ca fa' finta di senti 'mbarazzata
Tu si' sempi 'na vacca ed iu 'nu toru scatinatu